Nikollaj: Greva e urisë, e pashmangshme

Kryetari i Konfederatës së minatorëve, Kol Nikolla tha të shtunën se greva e urisë duket se do të jetë e pashmangshme dhe akuzoi METE-n si përgjegjëse për situatën e krijuar me ACR-në.
Zoti Nikolla, gjatë protestës së sotme, e cila ka hyrë në ditën e saj të gjashtë, theksoi se kërkesat e bëra publike tashmë me kohë, nuk po gjejnë zgjidhje, dhe, në kushte të tilla, nuk mbetet tjetër veçse përshkallëzimi i protestës.

Minatorët, të mbështetur edhe nga të tjerë të ardhur nga rrethet, protestuan sot në qendër të qytetit dhe më pas iu drejtuan sërish firmës ACR. Ata presin përgjigje për kërkesat e tyre duke filluar që nga rritja me 20% e pages, ulja e moshës së daljes në pension, kushte më të mira të punës, investime në minierë dhe siguri për jetën.

Takimi i të premtes mes një përfaqësie të minatorëve dhe zvministrit të METE-s, Neritan Alibali, nuk pati asnjë rezultat konkret dhe, sipas kryetarit Nikollaj, takimi ishte thuajse formal, raportoi Panorama.

“Ishte nje fotokopje e bisedave të zhvilluara para 3-4 vjetësh. Është e vërtetë që miniera ka probleme dhe këto kanë çuar në keqësimin e kushteve te punës, pagave të dobëta dhe sigurinë e jetës. Ministria na sqaroi se kanë filluar lëvizje emergjente, por kjo është patate e ngrohtë. Ne kërkojmë procedura administrative dhe është kjo ministri që duhet të ndërhyjë. Të bëhet me urgjence anullimi i kontratave nënkonçesionare, të pastrohet zona nga firmat politike, pirate dhe të rinegociohet me ACR-në për hapjen e pusit të thellësisë”, tha zoti Nikollaj./Telegrafi/