Dritan Prifti. Do të publikoj një video të re korrupsioni

Pak orë pas përfundimit dje në Gjykatën e Lartë, të ‘seancës Meta’ në adresat e drejtuesve dhe redaktorëve të mediave ka mbërritur një lajm mbi një video të regjistruar nga një kamerë e vendosur në orën e murit të zyrës së ish-ministrit Prifti.
Sipas këtij e-maili të botuar mbrëmë ia atribuonte burimin e lajmit Gjykatës së Lartë, ekziston një video tjetër ku shfaqet Dritan Prifti me një biznesmen, pronar televizionesh. Lajmi jepte edhe disa hollësi mbi profilin e biznesmenit në fjalë, pa përmendur emrin e tij, por duke shtuar se “në ditë në vazhdim, do botoheshin detaje nga kjo video”.
I pyetur dje në mbrëmje rreth këtij lajmi, nga Shekulli, ish-ministri dhe deputeti Prifti e quajti atë një presion në valën e presioneve të shumta që i janë bërë gjatë kohës së gjyqit, por pranoi se ka video të filmuara nga një kamerë e orës së murit në ish-zyrën e tij.
Sipas z.Prifti, kjo video ka si protagonist një njeri shumë të afërt me kryeministrin Berisha. “Ajo është një video me z.Fahri Balliu. Nëse dëshironi mund ta publikoj brenda tri ditëve” – tha Prifti mbrëmë në telefonatën me Shekullin.