Aksident në aksin Shkodër-Lezhë, humbin jetën burrë grua, plagoset djali

Mëngjesin e sotëm rrugët e vendit janë përgjakur sërish, ku për pasojë një çift bashkëshortësh kanë humbur jetën ndërsa djali i tyre është plagosur.



Aksidenti i rëndë me pasojë vdekjen ndodhi mëngjesin e sotëm në aksin rrugor Shkodër-Lezhë, në vendin e quajtur Beltoj. Një benz me targa SH 9726 C është përplasur me një kamion me targa SH3582E dhe për pasojë kanë gjetur vdekjen burrë e grua, të cilët udhëtonin si pasagjerë në veturë dhe është plagosur djali i tyre, i cili drejtonte automjetin.



Policia konfirmon se viktimat janë Hysni dhe Maje Brahimi, përkatësisht 67 dhe 64 vjeç, ndërsa i plagosur, por në gjendje jashtë rrezikut për jetën është djali i çiftit, Dritan Brahimi, i cili ndodhet në spitalin e Shkodrës.



Dyshohet se shkak i aksidentit është dalja e gabuar e kamionit nga një rrugë dytësore ndërkohë që policia, e cila ka shkuar në vendngjarje ka nisur hetimet për zbardhjen e plotë të ngjarjes.



Aksidentet rrugore vijojnë të përgjakin rrugët e vendit. Në harkun kohor të 24 orëve kanë ndodhur 3 aksidente me pasojë vdekjen e 4 personave.



Pasditen e djeshme në një aksident në aksin Korçë-Dishnicë, gjeti vdekjen një 26-vjeçari Gentian Beshiri, i cili po udhëtonte drejt shtetit grek. Ndërsa mëngjesin e së dielës një person humbi jetën dhe dy të tjerë u plagosën si pasojë e një aksidenti në aksin rrugor Lezhë-Laç.

Automjet tip ‘Citroen’ me targa AA789FM doli nga rruga dhe për pasojë gjeti vdekjen 23-vjeçari Blerim Bardhoku, ndërsa u plagosën dy shokët e tij 22-vjeçarë, Roland Bitri dhe Teodor Përlleshi.

/Shekulli Online/ E.L/