Këtë vit, Ministria e Arsimit dhe e Shkencës do të rrisë numrin e kuotave të studentëve që do të vijnë nga Kosova, Mali i Zi e Maqedonia. Ndërkohë që veç studentëve pritet të ketë shtim të stafit akademik si në universitetet shqiptare ashtu edhe në Kosovë, lidhur me bashkëpunimin dhe shkëmbimin e kapaciteteve në radhët e pedagogëve. Por jo vetëm kaq, fëmijët shqiptarë dhe ata kosovarë do të mësojnë gjuhën shqipe përmes teksteve të unifikuara. Pas një takimi me homologun kosovar, Ramë Buja, ministri i Arsimit dhe i Shkencës, Myqerem Tafaj, deklaroi se janë ngritur grupe pune nga të dyja vendet, të cilat do të hartojnë programe të përbashkëta duke nisur nga abetarja për të vazhduar më pas edhe me tekste të tjera.
Fëmijët shqiptarë dhe ata të Kosovës, pritet që të mësojnë gjuhën shqipe përmes teksteve të unifikuara. Në një takim të ministrit shqiptar të Arsimit dhe atij të Kosovës, u tha se janë ngritur grupe pune të përbashkëta, që po punojnë për unifikimin e programeve mes dy vendeve tona, në mënyrë që fëmijët e klasës së parë, të mësojnë me të njëjtën abetare. “Së shpejti, do të kemi tre tekste që do t’u shërbejnë fëmijëve, nxënësve që do të bazohen në program të njëjtë”, tha ministri i Arsimit, Myqerem Tafaj. Ministria e Arsimit këtë vit do të rrisë numrin e kuotave për studentet e Kosovës që mësojnë në Shqipëri.
Në të ardhmen pritet që diplomat e dhëna nga universitetet të kenë dy logo, atë të Shqipërisë dhe atë të Kosovës. Ministri Tafaj deklaroi se është rritur numri i studentëve kosovarë që studiojnë në universitetet shqiptare, si dhe theksoi se dy vendet po punojnë për lëshimin e diplomave universitare të përbashkëta.
Dy ministrat theksuan nevojën e rritjes së numrit të profesoratit në universitetet e të dyja vendeve për shkak të hendekut që ekziston mes numrit të studentëve gjithnjë në rritje dhe atij të pedagogëve.
Për më shumë detaje dhe të dhëna për projektin dy vendet do të njihen menjëherë pas mbylljes së punës paraprake nga grupet e punës. Për sa i takon logos së diplomave të Kosovës dhe Shqipërisë, deri në printim të këtij dokumenti do të ketë një punë intensive mes dy palëve për një përfundim bashkëkohor, por edhe një sistem të unifikuar. Numri i saktë i studentëve që do të fitojnë të drejtën e studimit në Shqipëri do të vendoset nga Këshilli i Ministrave.

Burimi: Gazeta Shqip