Zyra Qendrore Kombëtare Interpol Tirana, ditën e sotme, datë 18.10.2011, ka kryer ekstradimin nga Athina/Greqi, të i shtetasit shqiptar Gëzim Fuat Xhambazi, vjeç 38, lindur në Bilisht/Devoll.
Shtetasi Gëzim Xhambazi, me datë 24.02.2010, është kapur nga autoritete Greke të zbatimit të ligjit, ku nga kontrolli i ushtruar në mjetin e tij, i është gjetur fëmija M.K., të cilën ky shtetas e kishte kaluar ilegalisht në shtetin Grek.
Nga policia greke, më datë 26.02.2010, është deportuar përmes Pikës së Kalimit Kufitar Kapshticë/Devoll, shtetasja Teuta K., së bashku me dy fëmijët e saj vajzën M.K., të gjetur në mjetin e shtetasit Gëzim Xhambazi dhe djalin A. K..
Ndërkohë Gjykata e Rrethit Gjyqësor Korçë, me vendimin nr.86, datë 26.03.2010, ka caktuar ndaj tij masën e sigurisë “Arrest në Burg“ për kryerjen e veprës penale “Ndihmë për kalim të paligjshëm kufiri“, parashikuar nga neni 298/1 i Kodit Penal.
Si rezultat i bashkëpunimit të Interpol Tirana me Interpol Athinën, u bë i mundur arrestimi me qëllim ekstradimi drejt vendit tonë i shtetasit Gëzim Xhambazi, më datë 05.04.2011, në Greqi .