Kryetari i Partisë Socialiste, Edi Rama, tha të premten se vendimi i Kolegjit tregon “kapitullimin e e drejtësisë” dhe paralajmëroi nisjen e aksionit popullor “për të marrë drejtësinë e munguar”.

"Sot fjalët tona janë të tepërta sepse Kolegji Zgjedhor vulosi një grabitje të dhunshme ditën për diell, para popullit nxorri humbësin fitues. Sot fjalët tona janë të tepërta se të gjithë e dinë të vërtetën edhe gazetarët, qytetarët dhe ndërkombëtarët dhe kusarët. Akti i Kolegjit Zgjedhor flet më shumë se çdo fjalë për kapitullimin e drejtësisë", tha zoti Rama në deklaratën e parë pas vendimit të Kolegjit i cili rrëzoi kërkesën e PS-së pavlefshmërinë e vendimit të KQZ-së.

Kryetari i Partisë Socialiste bëri publike lëvizjen e mëtejshme të socialistëve dhe tha se Partia Socialiste do t’i rikthehet aksionit popullor, raportoi BW.

“Sot fjalët e çdo shqiptari që nuk vjedh janë të tepërta se çdo hajdut mund të ecë lirë. Sot fjalët janë të tepërta se drejtësia ka vdekur, opozita do flasë me aksion popullor për të ngjallur drejtësinë dhe shpëtuar Shqipërinë”, theksoi zoti Rama./Telegrafi/