Shpallja fitues e kandidatit të mazhorancës Lulzim Basha nga Kolegji Zgjedhor, i hap rrugën procedurave për marrjen zyrtarisht të postit të kryetarit të Bashkisë së Tiranës, të cilat përcaktohen në ligjin “Për organizimin dhe funksionimin e qeverisjes vendore”.

Sipas këtij ligji, mandati i kryetarit të Bashkisë Tiranës, vërtetohet, në rastin konkret, nga Gjykata e Tiranës brenda njëzet ditëve nga shpallja e rezultatit të zgjedhjes së tij. Mandati i kryebashkiakut të ri bëhet në praninë e këshillit bashkiak të dalë nga zgjedhjet e 8 majit. Ndërsa “shpallja e vlefshmërisë” së mandatit bëhet në mbledhjen e parë të këshillit bashkiak, ku kryetari bën betimin sipas formulës së përcaktuar në nenin 28 të këtij ligji dhe e nënshkruan atë.

Ushtrimi i mandatit të kryetarit të bashkisë fillon në çastin kur kryetari i ri bën betimin dhe përfundon kur bën betimin kryetari pasardhës, raportoi e përditshmja Panorama.

Megjithatë, duke pasur parasysh qëndrimin e Partisë Socialiste gjatë mandateve të këshillave të minibashkive, nuk përjashtohet mundësia që ajo të mos pranojë ndarjen e mandateve të këshillit bashkiak në mbledhjen e KQZ-së, e cila do të zhvillohet javën e ardhshme, çka do të thotë se vendimi i KQZ-së nuk do të marrë pesë votat e mjaftueshme dhe çështja do të shkojë sërish në Kolegj.

Në këtë rast, kryetari i ri i bashkisë, mund të marrë zyrtarisht detyrën përmes një ceremonie që e organizon prefekti. /Telegrafi/