Një biznesmen nga Lushnja me profesion inxhinier, sipas policisë është shpallur në kërkim nën dyshimin se është autor i masakrimit të 25-vjeçares Anisa Opingari, nga Fieri e cila u gjet e vdekur në Shëngjin tri ditë më parë.
Nëna e dy fëmijëve, grua e divorcuar katër muaj më parë, u gjet e masakruar me 20 plagë thike në trup. Ajo ishte qëlluar edhe në fyt me thikë ndërkohë që nga hetimi i kryer, bazuar edhe në dëshminë e të afërmve të viktimës, dyshohet se autor i krimit të rëndë është shtetasi me inicialet L.S, biznesmen nga qyteti i Lushnjës.
Të njëjtat burime thanë se policia e ka shpallur në kërkim, pasi ai nuk është gjetur në banesë në momentin kur efektivat shkuan për ta pyetur. Familjarët e tij i kanë deklaruar grupit të hetimit se i kërkuari ndodhej në plazh.
Policia ka thënë se në vendin e ngjarjes janë gjetur disa prova që mund të çojnë në identifikimin e vrasësit. Grupi i hetimit është duke verifikuar edhe thirrjet e fundit në telefonin e viktimës, (gjetur në çantën e saj), si dhe SMS-të e shkëmbyera prej saj. Në policinë e Lezhës janë shoqëruar mbi 30 persona, kryesisht kamerierë, pronarë lokalesh, pastruese, si dhe punonjës të tjerë të subjekteve private në plazhin e Shëngjinit.