Pas datës 24, me shfuqizimin e taksës së përvitshme të qarkullimit dhe atë të regjistrimit, ndryshon e gjithë skema e taksimit të makinave.
Taksa e qarkullimit, aktualisht 7500 lekë për makinat me benzinë dhe 10.000 lekë për një makinë me naftë, dhe taksa e regjistrimit, aktualisht 2400 lekë për të gjitha llojet e makinave, janë taksa vjetore, pra paguhen një herë në vit.
Pas 24 gushtit, taksa e qarkullimit do të paguhet sa herë që makina furnizohet me karburant. Pra ajo do të paguhet tashmë në karburante dhe makinat do të taksohen në masën 5 lekë për litër deri më 31.12.2011 dhe në masën 7 lekë për litër pas kësaj date. Kjo bën të mundur shpërndarjen në mënyrë të barabartë të taksës së qarkullimit, duke bërë që ata që e përdorin më shumë makinën të paguajnë më shumë taksë qarkullimi, raportoi e përditshmja Shqip.
Gjithashtu, pas 24 gushtit, ata që do të importojnë makina nuk do të paguajnë më doganë, por një taksë të re vjetore për makinat e përdorura. Ky aplikim takson më shumë makinat e përdorura, pra sa më e vjetër të jetë makina, aq më shumë taksë paguan. Për më tepër, makinat me naftë paguajnë më shumë se makinat me benzinë. Formula e re shumëzon cilindratën e makinës me koefiçentin e vjetërsisë dhe me taksën fikse për llojin e karburantit. Në terma konkretë, koefiçenti për vjetërsinë për tre vitet e para është 0, në vitin e katërt është 0.18 dhe rritet me 0.2 për dhjetë vitet e para, pas të cilave rritet me 0.4. Ndërsa, taksa fikse e karburantit është 25 lekë për naftën dhe 20 lekë për benzinën./Telegrafi/