TIRANE – Lajmifundit – Një numër prej 50 personash janë shoqëruar nga policia e Tiranës në lidhje me hetimet që po kryhen për grabitjen e rëndë me pasojë vdekjen në argjendarinë e shtetasit Rrapo Sinanaj në Tiranë mbrëmjen e djeshme.
Sipas njofimeve nga policia mësohet se viktima është qëlluar me tre plumba ndërsa rastësia e ka çuar në skenën e ngjarjes pasi argjendaria ishte në pronësi të vajzës së tij.
Sipas njoftimeve policore, mësohet se numri më i madh i të shoqëruarve janë persona kontigjent kriminal në vjedhje dhe grabitje por jo të lidhur direkt me ngjarjen nga ndonjë dëshmi a provë.
Shtetasi Rrapo Sinanaj, 62 vjeç, mbeti i vdekur në vend si pasojë e tre të shtënave me pistoletë, në ambientet e argjendarisë. Autori i cili ka patur si maskë një shall që i mbulonte gjysmën e fytyrës, është konfrontuar me 62-vjeçarin Sinanaj, në momentin që ky i fundit ka tentuar të shtypë butonin e alarmit.
Nga fiksimi i vendit të ngjarjes dyshohet se mes 62-vjeçarit dhe autorit ka patur fillimisht konfrontim fizik. Grabitësit i është zbuluar fytyra gjatë kësaj përleshjeje dhe ka qëlluar 3 herë me pistoletën që mbante në dorë duke e lënë të vrarë Sinanajn.
Mungesa e filmimeve të kamerës së sigurisë e cila rastësisht kishte qenë jashtë funksionit ka bërë që hetuesit të mos kenë të fiksuar skemën e vrasjes. Nga dëshmitë e personave që kanë parë lëvizjet para dhe pas krimit, autori mësohet të jetë në moshë të re dhe me trup të imët. Ngritja e profilit të autorit ka bërë që hetuesit të kenë dyshime të arsyeshme që ai të jetë përdorues droge.