Basha merr detyrën të premten

Kryetari i ri i Bashkisë së Tiranës, Lulzim Basha, do të marrë detyrën të premten, ditë në të cilën ai do të bëjë betimin para Këshillit të ri Bashkiak, në mbledhjen e parë të të mandatuarve.
Sekretari i Këshillit Bashkiak të kryeqyetit, Vladimir Gjonaj, tha se në sekretariat tashmë KQZ-ja e ka depozituar vendimin e Kolegjit për ndarjen e mandateve dhe, në këto kushte, mbledhja mund të zhvillohet pasi të jenë njoftuar të gjithë këshilltarët. Ligji për pushtetin vendor, sanksionon se mbledhja e Këshillit Bashkiak zhvillohet 5 ditë nga momenti i lajmërimit të këshilltarëve, që sipas zotit Gjonaj do të realizohet të hënën, për të mundësuar mbledhjen e këshillit të premten.

Sipas Ligjit për organizimin dhe funksionimin e pushtetit vendor, Rama e lë zyrtarisht detyrën, të cilën e ka marrë që në vitin 2000, pasi bën betimin kryetari i ri i Bashkisë, Lulzim Basha. "Ushtrimi i mandatit të kryetarit të komunës ose bashkisë, fillon në çastin kur bën betimin dhe përfundon kur bën betimin kryetari pasardhës", thuhet në pikën 4 të nenit 40 të Ligjit për pushtetin vendor, raportoi Ora News./Telegrafi/