Lulzim Basha betohet si kryetar i bashkisë së Tiranës: Fushata mbaroi, tani nis puna

TIRANE – Lajmifundit – Lulzim Basha u betua sot si kryetar i Bashkisë së Tiranës në një ceremoni të mbajtur në ambientet e Bashkisë ku kanë qenë të pranishëm përfaqësuesit e BE-së Luixhi Bruza, SHBA-së Dëbora Xhons dhe OSBE-së Eugen Volfarth dhe ambasadorja e Polonisë Irena Tatarzinska të cilët kanë ndjekur nga afër mbledhjen e parë të Këshillit të Bashkisë Tiranë dhe betimin e Bashës.
“Dua t`ju siguroj se administrata ime do të jetë gjithëpërfshirëse, ku çdo parti politike do të gjejë përfaqësinë. Sot nisim një rrugëtim të ri, për të ndërtuar Tiranën që ne të gjithë duam dhe ëndërrojmë. Sot fillojmë punën për përmbushje me sukses të këtij misioni”, tha Basha.
“Bashkia do të jetë e hapur për të gjithë qytetarët, është koha të shohim qytetin tonë si një familje e madhe”, deklaroi Basha.